««Հայաստանի Հանրապետության եւ Եվրոպական միության միջեւ Միության «Հորիզոն Եվրոպա» հետազոտությունների եւ նորարարության շրջանակային ծրագրին ՀՀ մասնակցության մասինե համաձայնագիրը վավերացնելու մասին» օրենքի նախագիծը փետրվարի 7-ին քննարկվել է ԱԺ եվրոպական ինտեգրման հարցերի մշտական հանձնաժողովում: Համաձայնագիրը ստորագրվել է 2021 թվականի նոյեմբերի 12-ին Բրյուսելում: Հայաստանի մասնակցությունը ծրագրին կնպաստի գիտական կազմակերպություններում եւ բուհերում գործող գիտական խմբերի՝ համաշխարհային մակարդակի գիտական հետազոտություններում անմիջական մասնակից դառնալուն:
ՀՀ կրթության, գիտության, մշակույթի եւ սպորտի նախարարի տեղակալ Կարեն Թռչունյանի ներկայացմամբ՝ համաձայնագրի վավերացումը կապահովի Հայաստանի Հանրապետության գիտական համակարգի Եվրոպական հետազոտական տարածքին ինտեգրվելու գործընթացի շարունակականությունը: Ըստ նրա՝ վերջինս բխում է ՀՀ կառավարության 2021-2026թթ. ծրագրի «Գիտություն» բաժնի «Մրցունակ գիտական գործունեության համար նպաստավոր ենթակառուցվածքների զարգացում» ուղղությամբ նախատեսված՝ Եվրոպական շրջանակային ծրագրերին ասոցացման եւ այդ ծրագրերում Հայաստանի ակտիվ մասնակցության խթանման ուղղությամբ նախատեսված միջոցառումների կատարումն ապահովելու անհրաժեշտությունից: Կարեն Թռչունյանը տեղեկացրել է, որ 2021 թվականին վերաբացվել է «Գիտական եւ նորարական գործընկերությանն աջակցման կենտրոնը», որի նպատակն է տրամադրել տեղեկատվություն եւ խորհրդատվություններ՝ շահառուների մասնակցությունը ծրագրին դյուրացնելու համար: Բանախոսը ներկայացրել է պարզաբանումներ ծրագրին մասնակցության համար ներկայացված չափանիշների, ինչպես նաեւ նախատեսվող ֆինանսական հատկացումների վերաբերյալ:
Հանձնաժողովը դրական եզրակացություն է տվել օրենքի նախագծին:
Նիստում քննարկվել են նաեւ արտախորհրդարանական շահագրգիռ ուժերի հետ ՀՀ-ԵՄ օրակարգային հարցերը:
Հայաստանի եվրոպական կուսակցության նախագահ Տիգրան Խզմալյանը նշել է, որ իրենց նպատակն է ներգրավվել եւ աջակցել հանձնաժողովի աշխատանքներին: Կուսակցությունը գործնական հարաբերություններ ունի եվրոպական մի շարք կուսակցությունների, այդ թվում «Renew Europe» վերկուսակցական խմբի հետ: Տիգրան Խզմալյանը ներկայացրել է այդ կուսակցությունների հետ իրենց համագործակցության փորձը, անդրադարձել Հայաստան-ԵՄ հարաբերությունների զարգացման տեսլականին: Նա տեղեկացրել է, որ փետրվարի 8-ին «Renew Europe»-ի ներկայացուցիչների հետ օնլայն հանդիպմանը քննարկվելու են ԵՄ-Ադրբեջան համաձայնագրին առնչվող հարցեր:
«Մենք պահանջելու ենք, որ ԵՄ-ի եւ ԵԽ-ի որեւէ ատյանի ու Ադրբեջանի միջեւ որեւէ քաղաքական, տնտեսական, դիվանագիտական եւ մշակութային պայմանագիր չքննարկվի եւ չընդունվի, քանի դեռ չեն վերադարձվել հայ ռազմագերիները»: Նա առաջարկել է այս հարցում հանձնաժողովի հետ համաձայնեցված կարծիք ներկայացնել, ինչին հանձնաժողովը դեմ չի եղել: