Վարորդները, որոնք իրենց ավտոմեքենաների վրա տեղադրում են լրացուցիչ ձայնային ուժեղացուցիչներ կամ «սպորտային» խլացուցիչներ, պետք է տուգանվեն։ Դրա մասին հունիսի 13-ին խորհրդարանի պաշտպանության և անվտանգության մշտական հանձնաժողովի նիստում՝ «Ճանապարհային անվտանգության ապահովման մասին» օրենքում փոփոխությունների և հարակից օրենքներում փոփոխությունների վերաբերյալ օրինագծերի փաթեթի քննարկման ժամանակ հայտարարել է օրենսդրական նախաձեռնության համահեղինակ, իշխող «ՔՊ» կուսակցության պատգամավոր Սերգեյ Բագրատյանը։
Ըստ նրա՝ լրացուցիչ երաժշտական ուժեղացուցիչները և շարժիչի խլացուցիչները խախտում են ինչպես հասարակական կարգը, այնպես էլ երթևեկության կանոնները։
«Արդյունքում, աղմուկի աղտոտվածության մակարդակը զգալիորեն բարձրանում է։ Հատկապես քաղաքի մարդաշատ վայրերում։ Չափազանց մեծ աղմուկը կարող է հանգեցնել տարբեր առողջական խնդիրների։ Դրանք ներառում են սթրես, քնի խանգարումներ և այլն։ Մի հեղինակավոր հոգեբան նույնիսկ պնդել է, որ արագ ռիթմով երգերը կարող են ստիպել վարորդին արագություն ավելացնել՝ իր վարումը հարմարեցնելով հենց այս երգի ռիթմին», ասել է Բագրատյանը։
Նախագծի համահեղինակ, իշխող կուսակցության պատգամավոր Արսեն Թորոսյանն իր հերթին ընդգծել է, որ որոշ քաղաքացիներ դա միտումնավոր են անում։ Ընդ որում՝ քաղաքի ամենամարդաշատ վայրերում։
«Պատահում է, որ դուք հանգիստ քայլում եք Կասկադի տարածքում, որտեղ արագության սահմանափակումը չպետք է գերազանցի 5 կմ/ժ-ը, և հանկարծ ձեր կողքով անցնում է ինչ-որ «մկանոտ» կերպար՝ այնպիսի բարձրացված երաժշտությամբ, որ դա կարող է ստիպել գերեզմաններից վեր կենալ նրանք, ում հուշարձանները խոյանում են մոտակայքում: «Օրինակ՝ Թամանյանը ամեն անգամ շուռ է գալիս գերեզմանի մեջ, երբ լսում է այսպիսի երաժշտություն», -կատակեց Թորոսյանը։
Ըստ նրա՝ Երևանը չի կարող լինել արևելյան տիպի քաղաք, որտեղ ամեն ինչ թույլատրված է։
«Այստեղ պետք է կարգուկանոն լինի։ Վստահ եմ, որ նման աղմուկը պատահական խախտում չէ, այլ դիտավորյալ վարքագիծ։ Տեղադրվում են «սպորտային» խլացուցիչներ և երաժշտական ուժեղացուցիչներ, որից հետո մեր քաղաքացիների խաղաղությունն ու լռությունը միտումնավոր խախտվում են քաղաքի ամենածանրաբեռնված հատվածներում», -ընդգծել է խորհրդարանականը։
Ըստ նախագծի՝ նման խախտումները կհանգեցնեն 10 հազար դրամ տուգանքի, ինչպես նաև սարքավորումների բռնագրավման և երկու տուգանային միավորների վերացման։
Թորոսյանը հույս է հայտնել, որ իրավապահ մարմինների աշխատակիցները բարեխղճորեն կկատարեն իրենց ծառայողական պարտականությունները՝ արձանագրելով և գրանցելով նման դեպքերը։
Ինչ վերաբերում է խախտումների անձանագրմանը և օրենքի պահպանման մոնիթորինգին, դա տեղի կունենա տեխնիկական զննման ընթացքում։ Այսպես, ամեն ինչ, որը գործարանային սարքավորում չէ, չի համապատասխանում չափանիշներին և ակնհայտորեն լրացուցիչ սարքավորում է, ավտոմեքենայից կհանվի։