Մրցակցության և սպառողների շահերի պաշտպանության հանձնաժողովի անդամ Տիգրան Մարկոսյանը ՀՀ պետական կառավարման ակադեմիայում «Կրթության որակի շաբաթ 2025» ծրագրի շրջանակում ներկայացրել է «Արդար մրցակցությունը և սպառողների շահերի պաշտպանությունը» թեմայով բաց դասախոսություն։
Հանդիպման սկզբում Տիգրան Մարկոսյանը ներկայացրել է Հանձնաժողովի գործունեությունը՝ պարզաբանելով, թե ինչպես է ձևավորվում և իրականացվում մրցակցային քաղաքականությունը Հայաստանում, ինչ մեխանիզմներով են բացահայտվում խախտումները, ինչպես նաև ինչ սկզբունքներով է ապահովվում սպառողների շահերի պաշտպանությունը։
Դասախոսության ընթացքում ներկայացվել է նաև Հանձնաժողովի մշակած նոր թվային գործիքը՝ «Սպառողի Օգնականը», որը հնարավորություն է տալիս․
- առցանց ներկայացնել բողոք՝ անմիջապես տնտեսավարող սուբյեկտին,
- ստանալ ծանուցումներ բողոքի կարգավիճակի և ընթացքի մասին,
- ստանալ պատասխաններ էլեկտրոնային փոստով։
Հանձնաժողովի անդամը նշել է, որ գործիքի գործարկումից ի վեր ստացվել է շուրջ 90 բողոք, որոնցից ավելի քան 30-ի բողոքները բավարարվել են։ Նրա խոսքով՝ տնտեսավարողները ցուցաբերում են պատասխանատու վերաբերմունք և ակտիվորեն մասնակցում են սպառողների խնդիրների արդյունավետ լուծմանը։ Հանդիպման ավարտին ուսանողները հնարավորություն են ունեցել հարցեր ուղղել Տիգրան Մարկոսյանին՝ քննարկելով արդար մրցակցության մշակույթի ձևավորման և սպառողների իրավունքների պաշտպանության կարևորությունը։