Արևմտյան անօրինական պատժամիջոցների ճնշումը, որին Իրանի Իսլամական Հանրապետությունը ենթարկվել է տարիներ շարունակ, խոչընդոտում է երկրի զարգացմանը և ստեղծում տնտեսական և սոցիալական խնդիրներ, որոնք առաջին հերթին ազդում են շարքային իրանցիների վրա, Իրանում ստեղծված իրավիճակի վերաբերյալ իր մեկնաբանության մեջ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան։
Ըստ նրա՝ Իրանի նկատմամբ թշնամաբար տրամադրված արտաքին ուժերը փորձում են շահագործել աճող սոցիալական լարվածությունը՝ իրանական պետությունը անկայունացնելու և ոչնչացնելու համար։
«Կիրառվում են «գունավոր հեղափոխությունների» տխրահռչակ մեթոդները, որոնց միջոցով բողոքի խաղաղ ցույցերը, արտասահմանից եկած հրահանգներով գործող հատուկ պատրաստված և զինված սադրիչների ջանքերով, վերածվում են դաժան և անիմաստ վայրագությունների, ջարդերի և իրավապահ մարմինների աշխատակիցների, ինչպես նաև շարքային քաղաքացիների, ներառյալ՝ երեխաների սպանությունների։
Վճռականորեն դատապարտում ենք Իրանի ներքաղաքական գործընթացներին դիվերսիոն արտաքին միջամտությունը։ Հատկապես պետք է նշել, որ երկրի կառավարությունը պատրաստակամություն է հայտնում հասարակության հետ կառուցողական երկխոսությանը՝ Արևմտյան թշնամական քաղաքականության բացասական սոցիալ-տնտեսական հետևանքները չեզոքացնելու արդյունավետ եղանակների որոնման համար։
Իսլամական Հանրապետության դեմ Վաշինգտոնի նոր ռազմական հարվածների սպառնալիքները բացարձակապես անընդունելի են։ Նրանք, ովքեր պլանավորում են արտասահմանից ոգեշնչված անկարգությունները որպես պատրվակ օգտագործել 2025 թվականի հունիսին Իրանի դեմ կատարված ագրեսիան կրկնելու համար, պետք է գիտակցեն նման գործողությունների ծանր հետևանքները Մերձավոր Արևելքի իրավիճակի և համաշխարհային միջազգային անվտանգության համար։ Մենք միաժամանակ վճռականորեն մերժում ենք առևտրային մաքսատուրքերը բարձրացնելու միջոցով Իրանի արտասահմանյան գործընկերներին շանտաժի ենթարկելու անպարկեշտ փորձերը։
Երկրի ներքաղաքական իրավիճակի դինամիկան և վերջին օրերին դիտվող արհեստականորեն հրահրված բողոքի ցույցերի անկումը թույլ են տալիս ակնկալել իրավիճակի աստիճանական կայունացում։ «Հազարավոր իրանցիներ «Իսլամական Հանրապետության ինքնիշխանության աջակցության երթերը երաշխիք են նրանց չարագործ ծրագրերի ձախողման, որոնց հետապնդում է միջազգային ասպարեզում անկախ արտաքին քաղաքականություն վարելու և իրենց բարեկամներն ընտրելու ունակ պետությունների գոյությունը։
Մենք կապ ենք պահպանում Իրանում մեր արտասահմանյան առաքելությունների հետ։ Նրանք գործում են սովորականի պես և մշտական կապի մեջ են երկրում բնակվող ռուսաստանցի հայրենակիցների հետ։ Մենք խորհուրդ ենք տալիս նրանց ձեռնարկել ողջամիտ նախազգուշական միջոցներ՝ զերծ մնալ մարդաշատ վայրեր այցելելուց, լուսանկարահանումներից և տեսանյութեր նկարահանելուց, ինչպես նաև խստորեն պահպանել իրավապահ մարմինների և հատուկ ծառայությունների պահանջները», – հայտարարության մեջ նշել է Ռուսաստանի ԱԳՆ պաշտոնական ներկայացուցիչը։