Երևանում կայացավ Հայաստանի ներդրումային և ֆինանսական
երկրորդ համաժողովը՝ «Հնարավորությունների ժամանակը․
Հայաստանը՝ համաշխարհային շուկաների նոր ճարտարապետության
մեջ» խորագրով, որը կազմակերպվել էր Freedom Broker Armenia-ի կողմից։
Միջոցառումը համախմբեց ավելի քան 1000 մասնակցի՝ պետական կառույցների,
ֆինանսական հատվածի, խոշոր բիզնեսի, միջազգային կազմակերպությունների,
տեխնոլոգիական ընկերությունների և փորձագիտական համայնքի
ներկայացուցիչների։
Համաժողովը շարունակեց 2024 թվականին մեկնարկած մասնագիտական
երկխոսությունը՝ այս տարի զգալիորեն ընդլայնելով իր օրակարգը։ Քննարկումների
առանցքում էին Հայաստանի կապիտալի շուկայի զարգացումը, միջազգային
ներդրումների ներգրավումը, երկրի ինտեգրումը համաշխարհային ֆինանսական
համակարգին, բանկերի և բրոքերների դերը, ֆինանսական հատվածի
տեխնոլոգիական վերափոխումը, արհեստական բանականությունը և ներդրումային
մշակույթի զարգացումը։
Համաժողովի կարևոր խորհրդանշական դրվագներից էր շախմատի առաջին
քայլի արարողությունը, որը նվիրված էր այս օրերին Ծաղկաձորում անցկացվող
դպրոցական շախմատի մրցաշարին։ Արարողությանը մասնակցեց Շախմատի
միջազգային ֆեդերացիայի (FIDE) նախագահ Տիմուր Թուրլովը, որը Հայաստան էր
այցելել այս մրցաշարի անցկացման առիթով։
Նրա մասնակցությունը համաժողովին խորհրդանշական կերպով միավորեց
ֆինանսական և շախմատային աշխարհներին բնորոշ գաղափարները՝
ռազմավարական մտածողությունը, կշռադատված որոշումների կայացումն ու
ապագայի նկատմամբ երկարաժամկետ տեսլականը։
Բացելով համաժողովը՝ Freedom Holding Corp. (FRHC)-ի հիմնադիր և գլխավոր
գործադիր տնօրեն, Շախմատի միջազգային ֆեդերացիայի (FIDE) նախագահ
Թիմուր Թուրլովը նշեց հարթակի և Հայաստանի ներդրումային ներուժի
նկատմամբ աճող հետաքրքրությունը։
«Երկուսուկես տարի առաջ մեր ֆինանսական համաժողովում մենք
համախմբել էինք ավելի քան 500 մասնակցի։ Այսօր մենք զգալիորեն
ավելի շատ ենք։ Մեր նպատակն է այս համաժողովը դարձնել
երկխոսության և կարծիքների փոխանակման մշտական հարթակ,
միավորել տարբեր ոլորտների առաջատար ներկայացուցիչներին և
նպաստել, որպեսզի քննարկումները վերածվեն լիարժեք նախագծերի և
համաձայնագրերի», — նշեց Տիմուր Թուրլովը։
Գործարար ծրագրի առանցքային իրադարձություններից էր «Հայաստանը
համաշխարհային տնտեսության մեջ՝ կապիտալի շուկաների պրիզմայով»
լիագումար նիստը, որը նվիրված էր համաշխարհային ֆինանսական համակարգում
տեղի ունեցող փոփոխություններին և Հայաստանի համար դրանցից բխող
հնարավորություններին։
Մասնակիցները քննարկեցին միջազգային կապիտալի ներգրավման հեռանկարները,
ֆինանսական ենթակառուցվածքի զարգացումը, պետության և կարգավորողի դերը,
առևտրային և ներդրումային նոր հնարավորությունները, ինչպես նաև Հայաստանի
տեղը ձևավորվող տարածաշրջանային և համաշխարհային շուկաների
ճարտարապետության մեջ։
Առանձին քննարկում նվիրված էր կապիտալի շուկաների առանցքային դերին
Հայաստանի տնտեսական ապագայի ձևավորման գործում։ Քննարկման կենտրոնում
էին բաժնետոմսերի և պարտատոմսերի շուկաների զարգացումը, հայկական
ընկերությունների IPO-ի հեռանկարները, բորսայական ենթակառուցվածքի դերը
ներդրումների ներգրավման գործում և կապիտալի շուկայի հնարավորությունները՝
որպես բիզնեսի ֆինանսավորման լրացուցիչ աղբյուր։
Մասնակիցները նշեցին, որ շուկայի հետագա աճը պահանջում է ոչ միայն
ժամանակակից ենթակառուցվածք և արդյունավետ կարգավորում, այլև որակյալ
թողարկողների թվի ավելացում, ընկերությունների թափանցիկության բարձրացում,
հասկանալի և որակյալ հաշվետվողականություն, ներդրումային գործիքների
շրջանակի ընդլայնում և ներդրողների վստահության ամրապնդում։
«Բանկերն ու բրոքերները՝ Հայաստանի ազգային բարեկեցության հիմքում»
պանելային քննարկման շրջանակում անդրադարձ կատարվեց բանկերի, բրոքերների
և կարգավորողի փոխլրացնող դերերին, միջազգային հաճախորդների սպասարկման
հնարավորություններին, ֆինանսական ծառայությունների զարգացմանն ու
ներդրումային մշակույթի ձևավորմանը։
Առանձին ուշադրություն դարձվեց հայկական ֆինանսական համակարգի
կարողությանը սպասարկելու այն հաճախորդներին, որոնց տնտեսական և
ներդրումային գործունեությունը դուրս է Հայաստանի սահմաններից՝ ներառյալ
միջազգային վճարումները, միջոցների բազմարժութային կառավարումը և
համաշխարհային ֆինանսական գործիքների հասանելիությունը։
Տեխնոլոգիական օրակարգը ներկայացվեց «Թվային հորիզոններ․ ինչպես է
տեխնոլոգիան փոխում ֆինանսները» քննարկման շրջանակում։ Փորձագետները
քննարկեցին արհեստական բանականության աճող դերը, ֆինանսական
ծառայությունների թվայնացումը, ֆինտեխի զարգացումը, թվային նույնականացումը, վճարային նոր լուծումները և բնակչության համար ներդրումային
ծառայությունների հասանելիության ընդլայնումը։
Համաժողովի առանցքային գործնական նորություններից էր Team Holding-ի
կորպորատիվ պարտատոմսերի հրապարակային տեղաբաշխման ծրագրի
ամբողջական ավարտի մասին հայտարարությունը։
Երրորդ՝ եզրափակիչ փուլի շրջանակում տեղաբաշխվել են 12,5 մլն ԱՄՆ դոլարի
ծավալով դոլարային պարտատոմսեր։ Ծրագրի ընդհանուր ծավալը կազմել է 31,5
մլն ԱՄՆ դոլար և 1,4 մլրդ ՀՀ դրամ։ Տեղաբաշխումն իրականացվել է Freedom
Broker Armenia-ի հետ համագործակցությամբ և ավարտվել է նախապես
սահմանված ժամկետից շուտ։
Ներգրավված միջոցները Team Holding-ը նախատեսում է ուղղել խմբի
ենթակառուցվածքային նախագծերի զարգացմանը, այդ թվում՝ լոգիստիկայի և
էներգետիկայի ոլորտներում, ինչպես նաև նոր աշխատատեղերի ստեղծմանը։
Freedom Broker Armenia-ի տնօրեն Հովակ Հովակիմյանը նշեց, որ հաջող
տեղաբաշխումը կարևոր նշանակություն ունի ոչ միայն մեկ ընկերության, այլև
Հայաստանի ամբողջ կապիտալի շուկայի հետագա զարգացման համար։
«Սա շատ կարևոր քայլ է։ Նման տեղաբաշխումներն ու այսպիսի
համագործակցությունները կարող են օրինակ դառնալ այլ
ընկերությունների համար։ Մեզ համար հատկապես կարևոր է Հայաստան
ներգրավել միջազգային ներդրողների, քանի որ այդ կերպ երկիր է մուտք
գործում միջազգային կապիտալ։ Եթե առաջարկում ենք որակյալ և
հասկանալի ներդրումային գործիք և այն ճիշտ ենք ներկայացնում
շուկային, այն կարող է հետաքրքիր լինել թե՛ տեղական, թե՛
արտասահմանյան ներդրողների համար։ Այսօր Հայաստանի կապիտալի
շուկան զարգանում է զգալիորեն ավելի արագ, քան մի քանի տարի
առաջ, և երկիրն ունի տարածաշրջանի կարևոր ֆինանսական
հարթակներից մեկը դառնալու ներուժ», — նշեց Հովակ Հովակիմյանը։
Համաժողովի շրջանակում տեղի ունեցան նաև գործընկերային և հատուկ
միջոցառումներ, այդ թվում՝ Freedom Broker Armenia-ի և Juventus Academy Armenia-ի
միջև համագործակցության հուշագրի ստորագրումը։
Հայաստանի ներդրումային և ֆինանսական երկրորդ համաժողովը շարունակեց 2024
թվականին ձևավորված հարթակի զարգացումը՝ ընդլայնելով ինչպես մասնակիցների
շրջանակը, այնպես էլ քննարկվող թեմաների սպեկտրը։
Համաժողովի հիմնական եզրահանգումներից մեկն այն էր, որ Հայաստանի
ֆինանսական շուկայի հետագա զարգացումը պահանջում է համալիր մոտեցում՝
ուժեղ ինստիտուտներ, թափանցիկ և կանխատեսելի կարգավորող միջավայր,
ժամանակակից տեխնոլոգիական ենթակառուցվածք, զարգացած ներդրումային մշակույթ և պետության ու մասնավոր հատվածի շարունակական
փոխգործակցություն։
Ավելի քան 1000 մասնակցի ներկայությունը հաստատեց բարձր
հետաքրքրությունը Հայաստանի կապիտալի շուկայի զարգացման հեռանկարների,
ներդրումային հնարավորությունների և երկրի՝ միջազգային ֆինանսական
համակարգում հետագա ինտեգրման նկատմամբ։
Համաժողովի մասին
Առաջին ներդրումային և ֆինանսական համաժողովը՝ «Հայաստանի կապիտալի
շուկաները․ հայացք ապագային», անցկացվել է 2024 թվականին և համախմբել
ավելի քան 500 մասնակից։ Freedom Broker Armenia-ի և ՀՀ էկոնոմիկայի
նախարարության համատեղ կազմակերպմամբ համաժողովը դարձել է շուկայի
առանցքային մասնակիցների փոխգործակցության առաջատար հարթակ՝ ներառյալ
պետական մարմինները, բիզնեսի ներկայացուցիչները, լրատվամիջոցները և լայն
հանրությունը։
Freedom Broker Armenia-ի մասին
Freedom Broker Armenia-ն (իրավաբանական անվանումը՝ «Ֆրիդոմ Ֆինանս Արմենիա»
ՍՊԸ) Հայաստանի Հանրապետության Կենտրոնական բանկի կողմից լիցենզավորված
ներդրումային ընկերություն է, որն ապահովում է հասանելիություն տեղական և
միջազգային ֆոնդային շուկաներին։ Ընկերությունն առաջարկում է ներդրումային և
բրոքերային ծառայությունների ամբողջական շրջանակ՝ արժեթղթերով գործարքներ,
ֆոնդային ներդրումներ, մասնակցություն IPO-ներին, ինչպես նաև ինքնուրույն
առևտուր առցանց հարթակի միջոցով։
Freedom Broker Armenia-ն միջազգային ֆինանսական Freedom Holding Corp. հոլդինգի
մաս է, որի բաժնետոմսերը ցուցակված են NASDAQ բորսայում (տիկեր՝ FRHC)։
Հոլդինգի շուկայական կապիտալիզացիան կազմում է 10,54 մլրդ ԱՄՆ դոլար,
ակտիվները՝ 10,3 մլրդ ԱՄՆ դոլար՝ 30.09.2026 թ. դրությամբ։ Խումբը ներկայացված
է ԱՄՆ-ում, Եվրոպայում, ԱՊՀ երկրներում և Ասիայում, ունի ավելի քան 11 000
աշխատակից, 232 գրասենյակ և 14 միլիոն օգտատեր թվային էկոհամակարգում։
Հ.Գ. Մասնակիցները ձեռքբերուններ համարեցին նոր ծանոթությունները, ներդրումային շուկայում նոր անունների և նոր ոլորտների բացահայտումը ՝ որոնք ևս նոր հնարավորություններ են ՝ավելին իրազեկվելու և լրացուցիչ կողմնորոշման համար:
Կարինե Սարգսյան