Մարդու իրավունքների պաշտպան Քրիստիննե Գրիգորյանը մամուլի ազատության օրվա առթիվ ՄԻՊ աշխատակազմում ընդունել է շուրջ մեկ տասնյակ լրատվամիջոցների ներկայացուցիչների՝ պատասխանելով նրանց հուզող հարցերին։
ՄԻՊ-ից NEWS.am-ին հայտնում են, որ ասուլիսի բացման իր խոսքում Պաշտպանը շնորհավորել է ԶԼՄ ներկայացուցիչներին մասնագիտական տոնի առթիվ և ընդգծել նրանց դերի կարևորությունը ժողովրդավարական հասարակության կերտման գործընթացում։ Քրիստիննե Գրիգորյանը նշել է, որ արագ փոփոխվող հասարակական հարաբերություններում և տեղեկատվական իրականությունում մասնագիտական պարտքը պատշաճ իրականացնելու համար շատ մարտահրավերներ կան լրագրողների աշխատանքի համար և ընդգծել, որ աշխատանքային կարողությունների շարունակական կատարելագործման հարցում ՄԻՊ աշխատակազմը շարունակելու է ձևավորված սերտ համագործակցությունը ԶԼՄ գործընկերների հետ՝ նեղ մասնագիտական կամ զգայուն թեմաների լուսաբանման հարցերում մասնագիտական խորհրդատվության տրամադրման նպատակով։
Քրիստիննե Գրիգորյանն ընդգծել է նաև, որ մարդու իրավունքների պաշտպանության կարևորագույն բաղադրատարրի՝ խոսքի և տեղեկատվության ազատության իրավունքի իրացման շուրջ ՄԻՊ աշխատակազմի և ԶԼՄ ներկայացուցիչների առաքելությունը ընդհանրություններ ունի, և այդ համատեքստում կարևորել է հանրության կրթման ու իրավագիտակցության բարձրացման համար ջանքերի մեկտեղումը։
Հաջորդիվ, Պաշտպանը ԶԼՄ գործընկերներին ներկայացրել է ՄԻՊ աշխատակազմում ստացված նախորդ տարվա դիմում-բողոքների ուսումնասիրությունների արդյունքում վերհանված տեղեկատվության ազատությանը վերաբերող վիճակագրական տվյալները և պատասխանել ԶԼՄ ներկայացուցիչների հարցերին։
Մասնավորապես՝ ասուլիսի ընթացքում Պաշտպանը հանգամանորեն անդրադարձել է հավաքների ու անհնազանդության ակցիաների ընթացքում ՄԻՊ աշխատակազմի կողմից իրականացվող մշտադիտարկումների արդյունքում արձանագրված անհամաչափ ուժի կիրառման, բերման ենթարկման ընթացակարգային խախտումների, լրագրողների հանդեպ պետական բարձրաստիճան ներկայացուցիչների կողմից բռնության դեպքերին։ Միաժամանակ Պաշտպանն ընդգծել է նաև լրատվամիջոցի կողմից ատելության ու անհանդուրժողականության հրահրման ու տարածման անթույլատրելիությունը՝ որպես պատասխանատու և պրոֆեսիոնալ լրագրության սկզբունք։
Քրիստիննե Գրիգորյանն անդրադարձել է նաև հանրային մեծ հնչեղության և ցասման արժանացած վրաերթի հետևանքով մահացած հղի կնոջ դեպքի քրեաիրավական, բարոյահոգեբանական կողմերին և ոստիկանական ուղեկցող ծառայության մասնագիտական ասպեկտներին։
Ի թիվս մի շարք այլ հարցերի, Պաշտպանը պատասխանել է նաև հանրային քննարկման առիթ հանդիսացած անհնազանդության բողոքի ակցիաներին երեխաների գիտակցված մասնակցության իրավունքի իրացման, երեխայի լավագույն շահի առաջնահերթության և ակցիաներով պայմանավորված՝ բոլոր քաղաքացիների իրավունքների պաշտպանության խնդիրներին, դատական գործերի ավտոմատ էլեկտրոնային մակագրության համակարգի կասեցված լինելու հանգամանքի ռիսկերին և ոստիկանության զորքերի բարեփոխման գործընթացի շարունակականության ապահովման անհրաժեշտությանը։