Դիմել եմ ՀՀ վարչապետ Նիկոլ Փաշինյանի աշխատակազմին Կառավարության ղեկավարի հետ հանդիպում կազմակերպելու առաջարկով։ Նաեւ մտադիր եմ նրան հնարավորություն տալ ելույթ ունենալ առաջիկա ժամերին կազմակերպված հանրահավաքին, որը տեղի կունենա Հանրապետության հրապարակում։ Այս մասին օգոստոսի 23-ին լրագրողների հետ զրույցում ասաց Լեհաստանում ՀՀ նախկին դեսպան, Սահմանադրական դատարանի աշխատակազմի նախկին ղեկավար Էդգար Ղազարյանը։
Նա ասաց, որ դեռ պատասխան չի ստացել, եւ, ըստ այդմ, հանդիպման կոնկրետ օր դեռ նշանակված չէ։
«Նիկոլ Փաշինյանն այն պաշտոնյաներից է, ով, իշխանության գալով, խոստացավ հրապարակային լինել։ Բացի այդ, ժամանակին նրա հետ հանդիպել է նաեւ Հանրապետության նախագահ Արմեն Սարգսյանը, որից հետո նրա մատնանշած ձեւաչափով հանդիպում անցկացվեց նաեւ Սերժ Սարգսյանի հետ։ Ուստի հուսով եմ, որ հանդիպումը, այնուամենայնիվ, կկայանա։ Համենայնդեպս, մերժում դեռ չենք ստացել»,- ասաց Ղազարյանը։
Նա հավելեց, որ հանդիպման թեման, եթե այն կայանա, կլինի Նիկոլ Փաշինյանի հրաժարականի հարցը։ Հանդիպումը պետք է տեղի ունենա լրագրողների ներկայությամբ։
ՍԴ աշխատակազմի նախկին ղեկավարն ասաց նաեւ, որ պատրաստ է Փաշինյանին հնարավորություն տալ ելույթ ունենալ Հանրապետության հրապարակում նախատեսված հանրահավաքին։ Այնուամենայնիվ, Փաշինյանն այդ հանրահավաքին պետք է կրկնի 2018-ին իր կառավարման 100-րդ օրվա կապակցությամբ հնչեցրած սեփական ելույթը։
Լրագրողները հետաքրքրվեցին՝ արդյո՞ք Ղազարյանը խորհրդակցել է հանրապետության նախկին նախագահ Սերժ Սարգսյանի հետ իր կողմից ներկայացված օրակարգի եւ այսօրվա հանրահավաքի կազմակերպման հետ կապված։ Ի պատասխան՝ Ղազարյանը նշեց, որ այդ հարցը քննարկել է բազմաթիվ քաղաքական ուժերի, հասարակական կազմակերպությունների, ԳԽ նախկին պատգամավորների, ինչպես նաեւ ՀՀ երրորդ եւ երկրորդ նախագահներ Սերժ Սարգսյանի եւ Ռոբերտ Քոչարյանի հետ։«Ես փորձեցի հանդիպում կազմակերպել նաեւ ՀՀ առաջին նախագահ Լեւոն Տեր-Պետրոսյանի հետ, բայց չստացվեց»,- վստահեցրեց նախկին դեսպանը։
Ընդդիմադիրը շտապեց նշել, որ այդ հանդիպումները չեն նշանակում, որ ինքը ինչ-որ մեկի ազդեցության տակ է։