ՀՀ ֆինանսների նախարար Տիգրան Խաչատրյանի տեղեկացմամբ՝ Հանրային ծառայությունները կարգավորող հանձնաժողովին գալիք տարում նախատեսվում է հատկացնել 850,9 մլն դրամ՝ 2021-ին հաստատված բյուջեի 837,6 մլն դրամի դիմաց, աճը կազմում է 1,6 տոկոս: Իրականացվելու է 1 ծրագիր, որն ընդգրկում է 2 միջոցառում:
Հանրային ծառայությունները կարգավորող հանձնաժողովի նախագահ Գարեգին Բաղրամյանը հայտնել է, որ հատկացված գումարի 89 տոկոսն ուղղվելու է աշխատակիցների աշխատավարձերի վճարմանը, իսկ 11 տոկոսն օգտագործվելու է կառույցի բնականոն աշխատանքների ապահովման նպատակով: Գումարի 1 տոկոսը՝ մոտ 8,5 մլն դրամ, օրենսդրության համաձայն, հանձնաժողովը հատկացնելու է սպառողների շահերի պաշտպանությամբ զբաղվող հասարակական կազմակերպություններին եւ այլ ծախսերին: ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանի գնահատմամբ՝ հասարակական կազմակերպություններին հատկացվող գումարներն այնքան էլ արդյունավետ չեն օգտագործվում: Նա հետաքրքրվել է՝ արդյոք առավել նպատակահարմար չէ՞ այդ գումարներն օգտագործել այլ մեխանիզմներով: Գարեգին Բաղրամյանը պարզաբանել է, որ նախորդ տարի եւս այս հարցն արծարծվել է, եւ նպատակահարմար է համարվել սպառողների շահերի պաշտպանությանն ուղղված այդ գործառույթը վերապահել Մարդու իրավունքների պաշտպանին կամ նրա գրասենյակի աշխատակիցներին: «Սրա համար անհրաժեշտ էր օրենսդրական փոփոխություն կատարել: Օրենսդրական փոփոխություններ նախաձեռնելը, որքան ես տեղյակ եմ, վերապահված է եղել Մարդու իրավունքների պաշտպանին»,-նշել է նա: