Հունաստանը Ուկրաինային չի փոխանցի Patriot կամ C-300 զենիթահրթիռային համակարգեր: Այս մասին Skai հեռուստաալիքին տված հարցազրույցում հայտարարել է Հունաստանի վարչապետ Կիրիակոս Միցոտակիսը։
Պատասխանելով հարցին, թե կառավարությունը մտադի՞ր է Կիև տեղափոխել ամերիկյան Patriot հակաօդային պաշտպանության համակարգերը, կամ ռուսական C-300 ՀՕՊ համակարգերը, Միցոտակիսն ասել է, որ Աթենքը դա չի անի։ «Թույլ տվեք բացատրել սա մի փոքր ավելի: Հունաստանը Ուկրաինային աջակցել է տարբեր ձևերով, այդ թվում՝ պաշտպանական նյութերով, ասել է վարչապետը։ «Բայց մենք ի սկզբանե ասել ենք, որ չենք կարող տրամադրել զենքի համակարգեր, որոնք կարևոր են մեր զսպման ներուժի համար»:
«Մենք ունենք ռազմական նյութերի ավելցուկ, որոնցով կարող ենք աջակցել Ուկրաինային։ Մենք դա արեցինք, և կարծում եմ, որ դա ճիշտ ընտրություն էր: Քանի որ մենք կարող ենք գտնել նման նյութեր, մենք կշարունակենք դա անել: Սակայն ձեր նշած հակաօդային պաշտպանության համակարգերը Հունաստանի օդային տարածքը պաշտպանելու կարևորագույն համակարգերն են և չեն փոխանցվի Ուկրաինային»,- նշել է վարչապետը։
Ավելի վաղ Հունաստանի գլխավոր ընդդիմադիր կուսակցությունը՝ «Արմատական ձախ ուժերի կոալիցիան – Առաջադիմական դաշինքը», Հունաստանի ազգային պաշտպանության նախարարությունից հստակ պատասխան էր պահանջել այն հարցին, թե արդյոք մտադիր է Կիևին փոխանցել Patriot-ն ու C-300-ը։ Կուսակցության ներկայացուցիչները վկայակոչել են բրիտանական Financial Times թերթի հրապարակումը, որտեղ գրված է Հունաստանի և Իսպանիայի վրա ԵՄ-ի և ՆԱՏՕ-ի այլ անդամների կողմից գործադրվող ճնշումների մասին։ Նրանք, ըստ հրապարակման, պահանջել են Ուկրաինային ավելի շատ հակաօդային պաշտպանության համակարգեր տրամադրել։
Ապրիլի 22-ին հունական Pronews տեղեկատվական պորտալը հայտնել էր, որ Աթենքը կարող է Patriot հակաօդային պաշտպանության համակարգը փոխանցել Ուկրաինային՝ ԱՄՆ-ի կողմից ֆինանսական փոխհատուցում տրամադրելու պայմանով, ինչպես նաև երաշխիքներ, որ Թուրքիան չի հարձակվի Հունաստանի վրա։ Նույն օրը Հունաստանի կառավարության խոսնակ Պավլոս Մարինակիսը հայտարարել է, որ իշխանությունները մտադիր չեն գործողություններ ձեռնարկել, որոնք կարող են վտանգել երկրի պաշտպանական ներուժը։