ՀՀ ԱԺ պաշտպանության և անվտանգության հարցերի մշտական հանձնաժողովն իր այսօրվա՝ հունիսի 7-ի նիստում դրական եզրակացություն տվեց Հունաստանի հետ ռազմատեխնիկական համագործակցության համաձայնագրի նախագծին։
ՀՀ պաշտպանության նախարար Սուրեն Պապիկյանի՝ Աթենք կատարած այցի ընթացքում 2023 թվականի դեկտեմբերին ստորագրված համաձայնագրի վավերացման նախագիծը հանձնաժողովում ներկայացրեց պաշտպանության փոխնախարար Արման Սարգսյանը։
«Այս համաձայնագրի նպատակն է ընդլայնել և խորացնել 2 երկրի միջև առկա ռազմատեխնիկական համագործակցությունը»,– ասաց Սարգսյանը:
Նրա խոսքով՝ համաձայնագրով սահմանված են համագործակցության ուղղությունները, ինչպես նաև կարգավորվում է մասնագետների պատրաստման գործընթացը:
«Ուղղությունները կլինեն զենքի և ռազմամթերքի արտադրության տեխնոլոգիաների փոխանակումը և տեխնիկական աջակցությունը, ռազմական հետազոտությունների և գնահատման ոլորտներում փորձի փոխանակումը, ռազմական նշանակության ապրանքների արտադրության համատեղ ձեռնարկությունների հիմնումը, ռազմատեխնիկական ոլորտում մասնագիտական կրթության, վերապատրաստման և որակավորման ծրագրերի իրականացումը, ինչպես նաև ռազմական նշանակության ապրանքների վերանորոգման ծառայությունների մատուցումը»,- նշեց Սարգսյանը:
Նշենք, որ դեռ 2011 թվականին կողմերը ստորագրել են պաշտպանական ոլորտում համագործակցության շրջանակային համաձայնագիր: Դրանից ելնելով՝ հայ զինծառայողները հնարավորություն ունենն սովորել հունական ռազմական բուհերում։ Կողմերը նաև տվյալներ են փոխանակել սպառազինությունների և ռազմական տեխնոլոգիաների վերաբերյալ։
2018 թվականին հայկական կողմն առաջարկել է կնքել ռազմատեխնիկական համագործակցության պրոֆիլային համաձայնագիր, որն էլ ստորագրվել է 2023 թվականի դեկտեմբերի 14-ին, Աթենքում։ ՀՀ կառավարությունը համաձայնագրին հավանություն է տվել 2024 թվականի մարտի 7-ին։