Հայաստանում անհրաժեշտ է իզոտոպային լաբորատորիաներ ստեղծել՝ կոնյակի որակը ստուգելու համար։ Այս մասին Ազգային ժողովում սեպտեմբերի 2-ին հայտարարեց Հանրապետության էկոնոմիկայի նախարար Գևորգ Պապոյանը Տարածաշրջանային և եվրասիական ինտեգրման հարցերի մշտական խորհրդարանական հանձնաժողովի նիստում՝ «Եվրասիական տնտեսական միության մաքսային տարածքից արտահանվող ապրանքների ծագման որոշման ներդաշնակեցված համակարգի մասին» համաձայնագրի վավերացման հարցի քննարկման ժամանակ։
Ավելի վաղ, հրապարակվել էին «Հակակեղծարարություն» միջազգային ասոցիացիայի ուսումնասիրության արդյունքները, ըստ որոնց՝ Ռուսաստանում վաճառվող հայկական կոնյակի նմուշների կեսում կոնյակի թորումը փոխարինվում է չպարզված սպիրտով։
«Հայկական կողմը գնահատում է իր ազգային բրենդը՝ կոնյակը։ Այդ նպատակով կստեղծվի իզոտոպների լաբորատորիա՝ ստուգելու Հայաստանից արտահանվող կոնյակի որակը»,- ասաց Պապոյանը։ Ֆինանսական միջոցները, նրա խոսքով, արդեն հատկացվել են։
«Արտահանվող կոնյակների բոլոր խմբաքանակները կփորձարկվեն իզոտոպային լաբորատորիայում։ Հետո դրանք կուղարկվեն արտահանման»,- ասաց նախարարը։ Կառավարության ներկայացուցչի կարծիքով՝ դրանով խնդիրը կլուծվի։