Երևան քաղաքը և մասնավորապես «Երևանի ավտոբուս» ՓԲԸ–ն այս տարի 8,5 մլրդ դրամի դեֆիցիտ է ունեցել։ Այս մասին, այսօր՝ նոյեմբերի 141-ին, Երևանի քաղաքապետարանի հերթական գործակարգավարական խորհրդակցության ժամանակ ասաց քաղաքապետ Տիգրան Ավինյանը։
«Դա պայմանավորված է նոր շարժակազմերով, նոր որակի տեխնիկայով և դրա սպասարկման խնդիրներով։ Միայն այս տարվա բյուջեի տեսանկյունից դա կազմում է Երևանի եկամուտների մոտավորապես 15%–ը։ Այսինքն, երբ ասվում է, որ քաղաքապետարանը պետք է սուբսիդավորի, ապա ասեմ` քաղաքապետարանը սուբսիդավորում է, մասնավորապես, ահռելի չափերով հանրային տրանսպորտը։ Նոր 171 ավտոբուսն էլ այդ ծախսն էականորեն կավելացնեն»,– նշեց Ավինյանը։
Նրա խոսքով` այս ամենից ելնելով, շատ կարևոր է միասնական տոմսային համակարգին անցում կատարելը, ինչն ուղղակի քաղաքապետարանի քմահաճույքը չէ, այլ որակի ապահովման և պահպանման միակ բանաձևն է։
Երևանի քաղաքապետը շեշտեց, որ առաջիկա ավագանու նիստի ժամանակ քննարկվելու է արտոնությունների փաթեթն այն խմբերի համար, որոնք իրապես դրա կարիքն ունեն։
Ավինյանը նաև հանձնարարական տվեց «Երևանի ավտոբուս» ՓԲԸ տնօրեն Բեգլար Կիրակոսյանին, որպեսզի վարորդների խնդիրներն էլ մշտապես ուշադրության կենտրոնում պահվեն։
Նա ընդգծեց` հանրային տրանսպորտի ոլորտում այժմ կարևոր անցումային շրջան է, և հույս հայտնեց, որ բոլորը կկարողանան անցում կատարել նախկին համակարգից։
Հիշեցնենք, որ նոյեմբերի 1-ից տրանսպորտից օգտվելու համար պարտադիր է 100 դրամանոց մետաղադրամ կամ QR կոդ ունենալ։ Երևանի տրանսպորտային համակարգը 5 տարի կսպասարկի «TelCell» ընկերությունը, այնուհետև նոր մրցույթ կհայտարարվի։
Հիշեցնենք, որ միասնական տոմսային համակարգը պետք է գործեր 2024 թվականի սեպտեմբերից, սակայն հունիսի 17-ին Երևանի քաղաքապետարանի գործակարգավարական նիստի ժամանակ հայտարարվեց, որ այն 1 կամ 2 ամսով կերկարաձգվի։ Այդ ժամանակ նշվեց, որ համակարգի ներդրումը սեպտեմբերի 1-ից տեղափոխել նոյեմբերի 1։
Հաջորդ նիստի ժամանակ էլ որոշում կայացվեց, որ միասնական տոմսային համակարգի ներդրումը տեղափոխվում է 2025 թվականի հունվար։
Նշենք, որ այս օրերին տրանսպորտի թանկացման դեմ ստորագրահավաք է իրականացնում Երեւանի նախկին քաղաքապետ Հայկ Մարությանը, ով նշում է, որ թե կարմիր գծերի թանկացումից, թե միասնական տոմսային համակարգի ներդրումից հսկայական լրացուցիչ գումարներ են մտնում Երեւանի բյուջե, որով կարելի է սուբսիդավորել տրանսպորտի ոլորտը եւ չբարձրացնել ուղեվարձը: