ՀՀ կառավարության «300 դպրոց, 500 մանկապարտեզ» ծրագրի շրջանակում այսօր Արմավիրի մարզի Արմավիր համայնքի Այգեվան գյուղում շուրջ 110 սաների համար բացվել է մոդուլային տիպի մսուր մանկապարտեզ:
Բացման արարողությանը ներկա են եղել ԿԳՄՍ նախարար Ժաննա Անդրեասյանը, Տարածքային կառավարման և ենթակառուցվածքների նախարար Դավիթ Խուդաթյանը, Քաղաքաշինության կոմիտեի նախագահ Եղիազար Վարդանյանը և Արմավիր համայնքի ղեկավար Վարշամ Սարգսյանը:
ԿԳՄՍ նախարար Ժաննա Անդրեասյանը շնորհավորել է ներկաներին մանկապարտեզի՝ որպես երեխաների կրթության հնարավորության նոր միջավայրի ստեղծման առիթով և նշել. «Շատ ուրախ եմ, որ այսուհետ 100-ից ավելի երեխաներ ամեն օր լինելու են զարգացնող, իրենց աճին նպաստող, առօրյան որակապես փոխող միջավայրում: Կառավարության 500 մանկապարտեզի ծրագիրը մեզ համար հատուկ նշանակություն ունի՝ նախադպրոցական կրթությունն առանձնակի կարևորելու տեսանկյունից: Ինչքան ավելի վաղ տարիքից են երեխաներն ունենում կրթության մեջ ընդգրկվելու հնարավորություն, այնքան ավելի բարձր արդյունքներ են նրանք գրանցում իրենց հետագա տարիներին: Վստահ եմ՝ Այգեվանի մանկապարտեզում ևս որակյալ արդյունքներ ենք ունենալու»:
Նախարարը շեշտադրել է նաև նոր միջավայրի պահպանության և զարգացման կարևորությունը՝ այն համայնքի բնակիչների ջանքերով ևս միասնաբար խնամելու և գյուղի յուրաքանչյուր երեխայի ամենասիրելի վայրը դարձնելու նպատակով: Ժաննա Անդրեասյանը շնորհավորել է նաև մանկապարտեզի աշխատակիցներին՝ ընդգծելով մասնագիտական զարգացման նոր հնարավորությունները: «ԿԳՄՍ նախարարությունը ջանք չի խնայում նպաստելու նաև նախադպրոցական կրթության մանկավարժների մասնագիտական զարգացմանն ու առաջընթացին: Վստահ եմ՝ մեր համատեղ աշխատանքի արդյունքում շահելու են երեխաները»,- նշել է նախարարը՝ աշխատակիցներին հորդորելով մասնակցել տարակարգի շնորհման գործընթացին և ունենալ հավելավճար ստանալու հնարավորություն:
ՏԿԵ նախարար Դավիթ Խուդաթյանը կարևորել է, որ համայնքում մանկապարտեզ է բացվում 30 տարվա դադարից հետո՝ ընդգծելով, որ հաջորդ տարի սաների թիվն ավելին է լինելու:
Ներկաներին շնորհավորել է նաև Արմավիր համայնքի ղեկավար Վարշամ Սարգսյանը: