Հայաստանյան հանդիսատեսը գնալով էլ ավելի պահանջկոտ է դառնում՝ նախընտրելով ոչ ստատիկ ցուցադրություններ եւ համերգներ, ինչի արդյունքում շատ արտիստներ սկսել են հանդես գալ տարբեր խմբերի հետ, որտեղ մասնակիցները կարողանում են թե՛ երգել, թե՛ պարել։ Նման խմբերի ցանկում առանձնանում է «Hi Arev»-ը, որտեղ կարող են սովորել 4-15 տարեկան ձայնային եւ պարային տվյալներ ունեցող երեխաները։ Խումբը գործում է Թագուհի Գեւորգյանի ղեկավարությամբ, ով շատ է կարեւորում ժամանակին համընթաց քայլելը։ Խմբի սաների անցած ճանապարհը հետաքրքիր է․ եղել են համագործակցություններ տարբեր սիրված արտիստների հետ, Հայաստանում գրեթե բոլոր մեծամասշտաբ միջոցառումներին ունեցել են մասնակցություն, ինչպես նաեւ շրջագայություններ տարբեր երկրներում։ 2019 թվականին Երևանում անցկացվող Ֆրանկոֆոնիայի օրերին նվիրված միջոցառումների փակման գալահամերգին մասնակցություն է ունեցել «Hi Arev» խումբը։ Թեհրանի Հայոց Թեմի Բարեխնամ Առաջնորդ` Գերաշնորհ Տ. Սեպուհ Ս. Արք. Սարգսեանի բարձր հովանավորությամբ՝ Հայաստանից «Hi Arev» խմբի սաները մասնակցել են «Զարթոնք» պարախմբի 30-ամյակին եւ Հովհաննես Թումանյանի ծննդյան 150-֊ամյակին նվիրված միջոցառումներին` «Չարի վերջը» երաժշտական ներկայացումով։ Դե իսկ 2024-ի հունիսի 1-ին ընդառաջ, 15 տարվա ընդմիջումից հետո, վերաթողարկվեց հանրահայտ հունիսմեկյան երգը` հին և նոր սերնդի կատարմամբ, ինչպես նաեւ խմբի սաները Հարութ Փամբուկչյանի (Ձախ Հարութ) հետ հանդես եկան «Հայաստանի բալիկներ» երգով։ Գյումրու քաղաքապետարանի մշակույթի վարչության հրավերով` «Hi Arev»-ի սաներն իրենց մասնակցությունն ունեցան նաեւ Երեխաների պաշտպանության օրվա համար կազմակերպված տոնակատարությանը։ Այս տարի Գ. Սունդուկյանի անվան ազգային ակադեմիական թատրոնում ցուցադրվեց «Մարդուկ Ջարդուկը» մանկական ինտերակտիվ ներկայացումը, որտեղ եւս ներգրավված էին «Hi Arev»-ի սաները։ Խմբի սաներին հանդիսատեսը կարող է նաեւ հիշել «Էրեբունի-Երևան 2806» տոնակատարության օրը Հանրային հեռուստաընկերության ուղիղ եթերում, երբ նրանք կատարեցին «Երևան իմ տուն» երգը` շրջելով Երևանի փողոցներում։ Խմբի ղեկավարը կարեւորում է սաների ստացած մասնագիտական կրթությունը, որով նրանք իրենց ունակությունները կբացահայտեն ու ցույց կտան տարբեր իրավիճակներում։ Խմբի սաները հանդես են եկել Ամանորյա տարբեր ներկայացումների ժամանակ, ինչպես նաեւ մասնիկն են դարձել Հանրապետության Հրապարակում գլխավոր տոնածառի լույսերի վառմանն ուղեկցող հեքիաթային մյուզիքլային միջոցառումներին։
ԱՆՆԱ ՔԱԼԱՇՅԱՆ