Իրանի և Պակիստանի միջև հարաբերությունների վատթարացման ֆոնին Ռուսաստանը կողմերին կոչ է անում զսպվածություն ցուցաբերել և ի հայտ եկած խնդիրները լուծել քաղաքական և դիվանագիտական մեթոդներով։ Այս մասին ասվում է ՌԴ ԱԳՆ պաշտոնական ներկայացուցիչ Մարիա Զախարովայի մեկնաբանության մեջ՝ կապված երկու իսլամական հանրապետությունների լարվածության հետ։
«Մենք տագնապով հետևում ենք վերջին օրերին Իրան-Պակիստան սահմանային գոտում իրավիճակի աճող սրմանը։ Մենք կողմերին կոչ ենք անում առավելագույն զսպվածություն ցուցաբերել և ի հայտ եկող խնդիրները լուծել բացառապես քաղաքական և դիվանագիտական մեթոդներով»,- ասել է Զախարովան։
«Մենք մեր հույսն ենք հայտնում, որ Իրանն ու Պակիստանը շուտով կգտնեն իրենց տարաձայնությունները ավանդական բարիդրացիության ոգով լուծելու ուղի, այդ թվում՝ կապված միմյանց տարածքներից բխող ահաբեկչական սպառնալիքների կասեցման հետ»,- հավելել է դիվանագետը։
Նա նաև ընդգծել է ինքնիշխան տարածքից դուրս ցանկացած հակաահաբեկչական գործողություն իրականացնելու անհրաժեշտությունը՝ ներգրավված պետությունների իշխանությունների միջև համաձայնությամբ և համակարգմամբ։ «Ցավալի է, որ դա տեղի է ունենում ՇՀԿ-ի բարեկամ երկրների միջև, որոնց հետ մենք համագործակցություն ենք զարգացնում», – ասել է նա: «Իրավիճակի հետագա սրումը ձեռնտու է նրանց, ովքեր շահագրգռված չեն տարածաշրջանում խաղաղությամբ, կայունությամբ և անվտանգությամբ»:
Բացի այդ, ՌԴ ԱԳՆ-ն ընդգծել է ռուսական կողմի հիմնարար պատրաստակամությունը՝ համագործակցելու միջազգային ահաբեկչության դեմ պայքարում դրա բոլոր ձևերով և դրսևորումներով։