Գործող կարգավորումների համաձայն՝ հարկային մարմնի կողմից տրվող կամ հարկ վճարողի անձնական գրասենյակից ներբեռնվող բազմաթիվ փաստաթղթեր պետական մարմիններին կամ ՏԻՄ-երին ներկայացնելիս հաճախ պահանջվում է, որ լինեն կնքված կամ ստորագրված հարկային մարմնի կողմից: Քանի որ գործընթացը ժամանակատար է, Կառավարությունն առաջարկում է սահմանել «QR կոդ» հասկացությունը: Առաջարկվող փոփոխության մասին նախագիծն Ազգային ժողովում առաջին ընթերցմամբ ներկայացրեց ՀՀ ՊԵԿ նախագահի տեղակալ Արթուր Մանուկյանը:
Նախագծի նպատակն է կանոնակարգել հարկային մարմնի տեղեկատվական բազայից կամ հարկ վճարողի անձնական գրասենյակից արտատպվող և ներբեռնվող փաստաթղթերի հետ կապված հարցերը:
«Առաջարկում ենք սահմանել «QR կոդ» հասկացությունը Հարկային օրենսգրքում և միաժամանակ սահմանել, որ անձնական գրասենյակից ներբեռնվող փաստաթղթերը կամ հարկային մարմնի տեղեկատվական բազայում առկա փաստաթղթերը հարկ վճարողը կարող է ներբեռնել QR կոդով վավերացված, որի արդյունքում արդեն այլ փաստաթղթեր լրացուցիչ հարկային մարմնի կողմից վավերացման ենթակա չեն:
Այդ կոդի միջոցով արդեն այն մարմինները, որոնցով ներկայացվում են փաստաթղթերը, կճանաչվեն որպես այդպիսին, այսինքն՝ վավերացված հարկային մարմնի կողմից: Այստեղ կխնայվի ինչպես հարկ վճարողների ժամանակը, այնպես էլ նյութական ռեսուրսների ավելորդ ծախսը»,- ասաց նախարարի տեղակալը:
Հարակից զեկուցող Նարեկ Ղահրամանյանը պարզաբանեց՝ նախագիծն այն մասին է, որ երբ հարկ վճարողը ցանկանա հարաբերվել պետական կամ ոչ պետական կառույցների հետ՝ համայնքապետարան, դեսպանատուն, կարիք չլինի ամեն անգամ դիմում տալ ՊԵԿ-ին, սպասել պատասխանին, ստանալ կնիք, այլ ինքնաշխատ տարբերակով բազայից կհանվեն տվյալները և QR կոդի միջոցով կներկայացվեն ըստ անհրաժեշտության:
Առաջարկվում է, որ նախագիծն ուժի մեջ մտնի 2026 թվականի հունվարի մեկից, քանի որ ծրագրային ապահովման խնդիր կա: