ՀՀ պետական գույքի կառավարման կոմիտեի նախագահ Առնակ Ավետիսյանի խոսքով` հաշվետվությունն ընդգրկում է 2020 օրացույցային տարվա ընթացքում իրականացված մասնավորեցման եւ լուծարման գործարքների, մասնավորեցումից ստացված բյուջետային մուտքերի մասին տեղեկությունները, ինչպես նաեւ մասնավորեցման արդյունքները` ըստ առանձին ընկերություններում կատարված ներդրումների եւ պրոֆիլի պահպանման վերաբերյալ:
«Հաշվետու ժամանակաշրջանում մասնավորեցվել են` ուղղակի վաճառքի ձեւով 1 եւ դասական աճուրդով 2 ընկերությունների պետական սեփականություն հանդիսացող բաժնետոմսերը»,- տեղեկացրել է զեկուցողը եւ հավելել, որ մասնավորեցումից ստացված միջոցները կազմել են 307 մլն 337 հազար դրամ, որից ՀՀ պետական բյուջեի սեփականաշնորհման հաշվին մուտքագրվել է 227 մլն 41 հազար դրամ, իսկ 80 մլն 296 հազար դրամ փոխանցվել է համայնքների բյուջեներ:
Փաստաթղթում արտացոլված են նաեւ լուծարման գործընթացի եւ դրա արդյունքում մարված պարտավորությունների վերաբերյալ տեղեկություններ: «Հաշվետու ժամանակահատվածում լուծարման գործընթացում գտնված 3 առեւտրային կազմակերպություններից 1 կազմակերպության լուծարման գործընթացն ավարտվել է, որի արդյունքում մարվել է շուրջ 59 մլն 786 հազար դրամ կրեդիտորական պարտք»,- ընդգծել է Առնակ Ավետիսյանը:
Նշվել է, որ ծրագրում կատարվել է փոփոխություն` ՀՀ համապատասխան օրենքով մասնավորեցման ծրագրի ցանկից հանվել է «Հայավտոկայարան» ՓԲԸ-ն:
Մինչեւ երկու ամիս ժամկետով հետաձգվել է ԱԺ պատգամավոր Աղվան Վարդանյանի հեղինակած «Գնումների մասին» ՀՀ օրենքում լրացում կատարելու մասին» օրենքի նախագծի քննարկումը: