Հոկտեմբերի 4-ին ոստիկանության Աշտարակի բաժնի քրեական հետախույզները դանակահարության վերաբերյալ ստացան օպերատիվ տեղեկություն: Ըստ տեղեկության` Արագածոտնի մարզի Սասունիկ գյուղի երկու բնակիչ` 41 և 35 տարեկան տղամարդիկ, գյուղի գերեզմանատանը վիճել են կենցաղային հարցերի շուրջ, և այդ ընթացքում 41-ամյա տղամարդն իր մոտ եղած ծալովի դանակով մի քանի հարված է հասցրել 35-ամյա համագյուղացուն` պատճառելով մարմնական վնասվածքներ:
Աշտարակի ոստիկանները ճշտեցին նաև, որ տուժածը բուժօգնության չի դիմել, իսկ դանակահարողն էլ դանակը նետել է դեպքի վայրում:
Նույն օրը դանակահարողն Սասունիկում հայտնաբերվեց և ներկայացվեց ոստիկանության Աշտարակի բաժին: Այստեղ նա խոստովանեց արարքը, ինչից հետո ինքն ու կազմված փաստաթղթերը ներկայացվեցին Արագածոտնի մարզային քննչական վարչություն:
Ֆիզիկական ներգործության և ապօրինի կերպով սառը զենք կրելու հատկանիշներով նախաձեռնվել է քրեական վարույթ:
Ձեռնարկվում են միջոցներ` հանցագործության գործիք դանակը հայտնաբերելու ուղղությամբ: Վեճի պատճառն ու դեպքի այլ հանգամանքներ պարզվում են:
Ֆիզիկական ներգործության և սառը զենք կրելու հատկանիշներով նախաձեռնվել է քրեական վարույթ(Տեսանյութ)
`Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: