ՀՀ կրթության, գիտության, մշակույթի և սպորտի նախարարության աջակցությամբ, ՀՀ վարչապետի տիկին Աննա Հակոբյանի հովանու ներքո, «Կողք կողքի» կրթամշակութային հասարակական կազմակերպությունը 2024 թվականի նոյեմբերի 28-ից դեկտեմբերի 3-ը կանցկացնի «Կողք կողքի» 5-րդ միջազգային ներառական երաժշտական արտ փառատոնը: Փառատոնն այս տարի անցկացվում է «Ներառական հասարակություն՝ քաղաքակիրթ երկիր» կարգախոսով։
Նոյեմբերի 28-ին մամուլի ասուլիսով ազդարարվել է փառատոնի մեկնարկը: Մամուլի ասուլիսին մասնակցել են ՀՀ ԿԳՄՍ նախարարի տեղակալ Դանիել Դանիելյանը, «Կողք կողքի» միջազգային ներառական երաժշտական արտ փառատոնի հիմնադիր Նաիրա Սարգսյանը, Հայաստանի պետական սիմֆոնիկ նվագախմբի տնօրեն Սարգիս Բալբաբյանը, «ArLeAM» ընկերության տնօրեն Լևոն Խաչատրյանը: Բանախոսները ներկայացրել են փառատոնի շրջանակում իրականացվող ծրագրերն ու միջոցառումները:
«Կողք կողքի» միջազգային ներառական երաժշտական արտ փառատոնը միտված է զարգացման առանձնահատկություններով երեխաների և պատանիների ստեղծագործական ներուժի բացահայտմանը։ Փառատոնի շրջանակում մասնագետները շարունակական աշխատանքի միջոցով զարգացնում ու կատարելագործում են երեխաների և պատանիների ստեղծագործական կարողությունները, ինչից հետո երեխաները և դեռահասները երաժշտարվեստի, արվեստի մյուս ոլորտների ներկայացուցիչների հետ հանդես են գալիս կողք կողքի՝ մեկ հարթակում։
ԿԳՄՍ նախարարի տեղակալ Դանիել Դանիելյանը նշել է, որ համընդհանուր ներառականությունը ՀՀ կառավարության ռազմավարության կարևոր կետերից մեկն է, և այն պետք է ապահովվի կրթության, մշակույթի, սպորտի ոլորտներում:
Որպես մշակույթի ոլորտում ներառականության ապահովմանն ու զարգացմանն ուղղված ծրագրեր՝ նա կարևորել է «Կողք կողքի» միջազգային ներառական երաժշտական արտ փառատոնի անցկացումը, աջակցությունը «Ճախրուկ» փառատոնին, ինչպես նաև ՀՀ ԿԳՄՍ նախարարության ենթակայության Երեխաների հատուկ ստեղծագործական կենտրոնի բազմաթիվ նախագծերը՝ ներառականության ապահովման նպատակով:
««Կողք կողքի» փառատոնն ունի խոսուն անվանում. այն արտացոլում է փառատոնի գաղափարն ու նպատակը՝ միասնականությունն ու միմյանց սատարումը։ Եվ հատկանշական է, որ մեկ հարթակում ձեռք ձեռքի հանդես են գալու անվանի երաժիշտներն ու զարգացման առանձնահատուկ պայմանների կարիք ունեցող երեխաները»,- ասել է Դանիել Դանիելյանը:
«Կողք կողքի» միջազգային ներառական երաժշտական արտ փառատոնի հիմնադիր Նաիրա Սարգսյանի տեղեկացմամբ՝ փառատոնն իր շուրջն է համախմբում զարգացման առանձնահատկություններով երեխաներին և պատանիներին, որոնք ստեղծագործելու ցանկություն և շնորհ ունեն. «Փառատոնը մի հարթակ է, որը հնարավորություն է ընձեռում զարգացման տարբեր կենտրոններին ներկայացնելու ամբողջ տարվա աշխատանքները: Փառատոնի շրջանակում միջոցառումները բազմաթիվ և բազմաբնույթ են: Այս տարի փառատոնը մեկնարկում է նոյեմբերի 28-ին՝ ժամը 18:00-ին. Հովհաննես Թումանյանի անվան ազգային տիկնիկային թատրոնում կկայանա փառատոնի բացման արարողությունը, որի շրջանակում տեղի կունենա «Առաջին քայլեր» խորագրով համերգը։ Նոյեմբերի 29-ին՝ ժամը 17:00-ին, Հենրիկ Իգիթյանի անվան գեղագիտության ազգային կենտրոնի «Փոքր թատրոնի» բեմում փառատոնի մասնակիցները հանդես կգան թատերական ներկայացմամբ։ Նոյեմբերի 30-ին՝ ժամը 13:00-ին, Խնկո-Ապոր անվան ազգային մանկական գրադարանում գրական օր է, մասնակիցները կասմունքեն, կլինեն բանաստեղծությունների ընթերցումներ, ժամանցային ծրագիր։ Հայաստանում ներառականության զարգացման և խթանման, ոլորտում շարունակական կրթության ապահովման նպատակով դեկտեմբերի 1-ին՝ ժամը 13:00-ին, «ԼուսԷ» հիմնադրամում ներառական ոլորտի հեղինակավոր մասնագետներ Ռաֆաելա Շտայնբախը (թերապևտ, օստեոպատ, Գերմանիա) և Ալինա Սարգսյանը (նյարդահոգեբան, երաժիշտ, մանկավարժ, ռիթմի մասնագետ, Ռուսաստան) կանցկացնեն սեմինարներ և վարպետության դասընթացներ, որին կմասնակցեն հայաստանյան տարբեր կազմակերպությունների շուրջ 200 մասնագետներ և ծնողներ»:
Նաիրա Սարգսյանի տեղեկացմամբ՝ փառատոնի գալա համերգը տեղի կունենա դեկտեմբերի 3-ին՝ ժամը 19:00-ին Ա. Սպենդիարյանի անվան օպերայի և բալետի ազգային ակադեմիական թատրոնի բեմում: Օրը պատահական չէ. ՄԱԿ-ի Գլխավոր ասամբլեայի կողմից դեկտեմբերի 3-ը հռչակվել է Հաշմանդամների միջազգային օր։ Գալա համերգի ընթացքում փառատոնի մասնակիցները հանդես կգան Հայաստանի պետական սիմֆոնիկ նվագախմբի հետ (գեղարվեստական ղեկավար և գլխավոր դիրիժոր Սերգեյ Սմբատյան): «Երեխաների և պատանիների հետ բեմում՝ կողք-կողքի հանդես կգան նաև անվանի անհատ կատարողներ։ Գալա համերգի շրջանակում Ա. Սպենդիարյանի անվան օպերայի և բալետի ազգային ակադեմիական թատրոնի նախասրահում կկազմակերպվի առանձնահատուկ կարիքներով երեխաների նկարչական և ձեռագործ աշխատանքների ցուցահանդես-վաճառքը, որի ամբողջ հասույթը կտրամադրվի այն կազմակերպություններին, որոնցից ձեռք կբերվեն ստեղծագործական աշխատանքները: Այս տարի փառատոնին կմասնակցեն սահմանափակ կարողություններ ունեցող շուրջ 400 երեխաներ՝ Հայաստանից, Ռուսաստանից, Վրաստանից, Ղազախստանից, Մոլդովայից, Ղրղզստանից, Ուզբեկստանից»,- ասել է Նաիրա Սարգսյանը։
Սարգիս Բալբաբյանը կարևորել է Հայաստանի պետական սիմֆոնիկ նվագախմբի և առանձնահատուկ կարիքներ ունեցող երեխաների համատեղ ելույթը: Նվագախմբի տնօրենի խոսքով՝ այս նախաձեռնությունը հնարավորություն է տալիս երեխաներին ոչ միայն հանդես գալու նվագախմբի հետ նույն բեմում, այլև իրականացնելու նրանց երազանքները:
«Երբ երեխաները տեսնում են տարբեր արտիստների ելույթները նվագախմբի հետ, հաճախ երազում են նրանց նման կանգնել բեմում և երգել կամ նվագել սիմֆոնիկի նվագակցությամբ։ Առանձնահատկություններով երեխաներն իսկապես տաղանդավոր են, և մեծ ներդրում է կատարվում նման մակարդակով ներկայանալու համար: Դեկտեմբերի 3-ին հատուկ երեկո է լինելու»,- նշել է Սարգիս Բալբաբյանը և հավելել, որ և՛ երեխաներն են ոգևորված, և՛ երաժիշտները։
«ArLeAM» ընկերության տնօրեն Լևոն Խաչատրյանը կարևորել է այս նախաձեռնությունը և ընդգծել, որ ընկերությունը տարիներ շարունակ փառատոնի կողքին է, և համագործակցությունը լինելու է շարունակական:
Նշենք, որ փառատոնի հովանավորներն են Երևանի քաղաքապետարանը, «Իմ քայլը» հիմնադրամը, «ArLeAM» ընկերությունը: