ՀՀ կրթության, գիտության, մշակույթի և սպորտի նախարարության 2025 թվականի բյուջեով կապիտալ ծրագրերի համար հատկացված միջոցներից կատարվել է վերաբաշխում՝ 525 մլն 496 հազար դրամի չափով:
Հատկացված միջոցներն ուղղվելու են մի շարք դպրոցների շենքային պայմանների բարելավմանը և նախադպրոցական հաստատությունների գույքի ձեռքբերմանը՝ ՀՀ կառավարության «300 դպրոց, 500 մանկապարտեզ» ծրագրի շրջանակում: Համապատասխան որոշումն ընդունվել է գործադիրի այսօրվա նիստում:
Հիմնական զեկուցող, ԿԳՄՍ նախարար Ժաննա Անդրեասյանի խոսքով՝ նախատեսվում է ֆինանսական միջոցներ հատկացնել Շիրակի մարզի Ազատանի միջնակարգ դպրոցի կրտսեր դպրոցի մասնաշենքի հիմնանորոգման, ինչպես նաև 82 դպրոցի տեխնիկական վիճակի զննության, չափագրության և նախահաշվային փաստաթղթերի մշակման, Երևանի թիվ 33 հիմնական դպրոցում նոր կառուցված մարզադահլիճի մասնաշենքի գազաֆիկացման, նորոգման ընթացքում գտնվող 21 դպրոցի համար հեղինակային հսկողության ծառայության ձեռքբերման նպատակով։
Համապատասխան ֆինանսական միջոցներ կուղղվեն նաև Լոռու մարզի 14 նորակառույց մանկապարտեզների համար նոր գույքի գնման նպատակով:
Մասնավորապես, Շիրակի մարզի Ազատանի միջնակարգ դպրոցի տարրական դասարանների համար նախատեսված մասնաշենքի նորոգման աշխատանքների ապահովման համար կհատկացվի 168.8 մլն դրամ: 82 դպրոցի նորոգման աշխատանքները մեկնարկելու նպատակով տեխնիկական զննության, չափագրության և նախահաշվային փաստաթղթերի մշակման ծառայության ձեռքբերման համար կհատկացվի 310.5 մլն դրամ: Ժաննա Անդրեասյանի խոսքով՝ ՀՀ կառավարության «Մինչև 2026 թվականն առնվազն 300 դպրոցի կառուցման, վերակառուցման, հիմնանորոգման» ծրագրի շրջանակում ներկայում ընտրված է 121 դպրոց, որոնց շենքերը պետք է վերանորոգվեն, հիմնանորոգվեն. 21 հասաստատությունում աշխատանքներն ընթացքի մեջ են։
«Կրթական միջավայրն ապահովվելու է նույն չափանիշներով և միասնական մոտեցմամբ, որը ներառում է մի շարք աշխատանքներ՝ հատակի, տանիքի, սանհանգույցների ներքին հարդարում, ըստ անհրաժեշտության՝ պատուհանների, ջեռուցման, կոյուղու, լուսավորության հետ կապված հարցեր, ինչպես նաև տարածքի բարեկարգումը և այլն: Այսպիսի աշխատանքներն արդեն պլանավորված են 121 դպրոցում, որոնցից 21-ում դրանք իրականացվում են»,- ասել է ԿԳՄՍ նախարարը:
Ժաննա Անդրեասյանի դիտարկմամբ՝ որոշման շրջանակում Լոռու մարզի 14 նորակառույց մանկապարտեզների նոր գույքով համալրման արդյունքում նախադպրոցական հաստատությունները կշահագործվեն՝ ունենալով ամբողջական պայմաններ:
ՀՀ վարչապետ Նիկոլ Փաշինյանը, անդրադառնալով հիմնանորոգման ծրագրում ընդգրկված ուսումնական հաստատություններին, կարևորել է աշխատանքների որակն ու ժամկետների պահպանումը: Այս հարցի շուրջ ծավալվել է քննարկում: