Գդանսկում Ռուսաստանի գլխավոր հյուպատոսության փակմանը ի պատասխան՝ Մոսկվան կրճատելու է ՌԴ-ում Լեհաստանի դիվանագիտական և հյուպատոսական ներկայությունը։ Այս մասին TASS-ին հայտնել է Ռուսաստանի արտաքին գործերի նախարարության խոսնակ Մարիա Զախարովան։
«Որպես փոխադարձ միջոց՝ ռուսական կողմը կնվազեցնի ՌԴ-ում Լեհաստանի դիվանագիտական և հյուպատոսական ներկայությունը», – ասել է ռուս դիվանագետը։
Իր հերթին Ռուսաստանի նախագահի մամուլի քարտուղար Դմիտրի Պեսկովը հայտարարել է, որ Լեհաստանը փորձում է զրոյացնել Ռուսաստանի հետ դիվանագիտական հարաբերությունները և Մոսկվան այդ առիթով կարող է միայն ափսոսանք հայտնել։
«Լեհաստանի հետ հարաբերություններն ամբողջությամբ քայքայվել են։ Սա, հավանաբար, այդ քայքայման, ինչպես նաև լեհական իշխանությունների ցանկության դրսևորումն է՝ զրոյի հասցնել հյուպատոսական կամ դիվանագիտական հարաբերությունների ցանկացած հնարավորություն։ Այստեղ կարելի է միայն ափսոսանք հայտնել»,- ասել է Կրեմլի ներկայացուցիչը։
Նա նշել է, որ լեհական իշխանությունների այն որոշումը, ըստ որի պետք է փակել Գդանսկում գործող վերջին ռուսական գլխավոր հյուպատոսությունը, հեռու է խելամտությունից։
«Դուք պետք է հարցնեք Վարշավային, թե ինչի մասին է սա։ Բայց դա ոչ մի կապ չունի առողջ բանականության հետ», – նշել է նա։
Ավելի վաղ Լեհաստանի արտաքին գործերի նախարար Ռադոսլավ Սիկորսկին հայտարարել էր, որ Լեհաստանը կչեղարկի Գդանսկում Ռուսաստանի գլխավոր հյուպատոսության գործունեության թույլտվությունը՝ ի պատասխան վերջերս տեղի ունեցած երկաթուղային դիվերսիայի։
Լեհաստանի վարչապետ Դոնալդ Տուսկը հայտարարել էր, որ երկաթուղային դիվերսիան իրականացրել են երկու ուկրաինացի քաղաքացիներ, որոնք կապեր ունեն ռուսական հետախուզական ծառայությունների հետ։