ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովն այդ պաշտոնում ընտրելու համար առաջարկել է «Քաղաքացիական պայմանագիր» խմբակցության կողմից առաջադրված Հակոբ Հակոբյանի թեկնածությունը:
Հակոբ Հակոբյանի կենսագրությունն ու աշխատանքային ուղին ներկայացրել է «Քաղաքացիական պայմանագիր» խմբակցության պատգամավոր Գուրգեն Արսենյանը: Հակոբ Հակոբյանը, ով հայտնի է նաեւ Հակոբ Մովսես գրական կեղծանվամբ, ծնվել է 1952 թվականին, կրթությամբ բանասեր է, թարգմանիչ, աշխատել է որպես ուսուցիչ, սրբագրիչ, գրական աշխատող, խմբագիր, ՀՀ մշակույթի նախարար:
Ելույթ ունենալով՝ Հակոբ Հակոբյանը ներկայացրել է իր պատկերացումները մեդիադաշտի վերաբերյալ՝ ընդգծելով դրան առանձնահատուկ ուշադրություն դարձնելու անհրաժեշտությունը, քանի որ, ըստ նրա՝ «տեղեկատվությունը հասարակության, ինչպես նաեւ պետության բերանն է, նաեւ՝ ականջը»:
«Այսօրվա մեր բոլոր իրողությունները, թե՛ քաղաքական, թե՛ հասարակական, տեղավորված են այդ դաշտում»,-ասել է նա: Թեկնածուն անդրադարձել է այն խնդիրներին, որոնք նկատել է տեսալսողական մեդիադաշտում, ներկայացրել դրանց լուծման իր տեսլականն ու պատկերացումները, կարեւորել հեռուստատեսությունում կրթական նյութերի առկայությունը:
Թեկնածուն պատասխանել է պատգամավորների հարցերին: