Իլինոյսի համալսարանի գիտնականները Ուրբանա-Շամպեյնում կարևոր հայտնագործություն են կատարել՝ բացահայտելով խոլեստերինի մակարդակի և կրծքագեղձի քաղցկեղի զարգացման միջև փոխադարձ կապի մեխանիզմը։ Հետազոտության արդյունքները հրապարակվել են Nature Cancer բժշկագիտական հանդեսում։
Հայտնի է, որ խոլեստերինի բարձր մակարդակը կապված է հիվանդության նվազ բարենպաստ ելքի հետ, սակայն այդ ազդեցության հիմքում ընկած մոլեկուլային ուղիները մնում են անհասկանալի։ Գիտնականները կենտրոնացել են խոլեստերինի մետաբոլիտ 27-հիդրօքսիխոլեստերինի վրա, որը, ինչպես ցույց են տվել նախակլինիկական մոդելները, թուլացնում է իմունային համակարգի՝ քաղցկեղի բջիջների վրա հարձակվելու ունակությունը։
Մասնավորապես, գիտնականները պարզել են, որ 27-հիդրօքսիխոլեստերինն ազդում է նեյտրոֆիլների՝ իմունային բջիջների հատուկ տեսակի, վրա և խթանում է դրանց կողմից արտաբջջային վեզիկուլների արտազատումը։ Այդ վեզիկուլների միջոցով նեյտրոֆիլները «ազդանշաններ են փոխանցում» քաղցկեղի բջիջներին՝ փոխելով դրանց վարքագիծը։
Հետագա վերլուծությունը ցույց է տվել, որ այդ ազդանշանները կրծքագեղձի քաղցկեղի բջիջները ավելի դիմացկուն են դարձնում քիմիաթերապիայի նկատմամբ, մեծացնում դրանց «ցողունային» ակտիվությունը և նպաստում մետաստազավորմանը՝ այսինքն՝ ուռուցքի տարածմանն այլ օրգաններ։
Հայտնագործության հիմնական գաղափարն այն է, որ այդ ազդանշանային ուղու խափանումը՝ 27-հիդրօքսիխոլեստերինից մինչև նեյտրոֆիլներ և քաղցկեղի բջիջներ, կարող է քաղցկեղի առաջընթացը դանդաղեցնելու կամ դադարեցնելու նոր բուժման ռազմավարություն դառնալ։
Հետազոտական խումբը ներկայում ծրագրում է մշակել այս ուղին հիվանդության վաղ փուլերում արգելափակող թերապևտիկ մոտեցումներ, նվազեցնելով մետաստազների առաջացման վտանգն ու և բարձրացնելով բուժման արդյունավետությունը։
Այս հայտնագործությունը հույս է ներշնչում ավելի ճշգրիտ թերապիաների մշակման համար և ցույց է տալիս՝ ինչպես է խոլեստերինի նյութափոխանակությունը անմիջականորեն ազդում կրծքագեղձի քաղցկեղի աճի և ագրեսիվության վրա։